Phili 2 | NdeIBE | STEP | Uma kukhona okukhuthazayo ngokuhlangana loKhristu, uma kulenduduzo evela ethandweni lwakhe, uma kulobudlelwano loMoya, uma kulozwelo lesihawu,

Philippians 2

Ukulingisela Ukuthobeka KukaKhristu

1 Uma kukhona okukhuthazayo ngokuhlangana loKhristu, uma kulenduduzo evela ethandweni lwakhe, uma kulobudlelwano loMoya, uma kulozwelo lesihawu, 2 phelelisani intokozo yami ngokuba ngqondo nye, lilothando lunye, limunye emoyeni njalo linjongo yinye. 3 Lingenzi lutho ngokuzikhukhumeza loba ukuziphakamisa okuyize, kodwa ngokuthobeka. Khangelani abanye njengabangcono kulani. 4 Lowo lalowo wenu kangakhathaleli inzuzo yakhe kuphela kodwa akhathalele lenzuzo yabanye.

5 Isimo sengqondo yenu kumele sifanane lesikaKhristu uJesu:

6 Yena okwathi ngemvelo enguNkulunkulu kacabanganga ukulingana loNkulunkulu kuyilutho olungafinyelelwa 7 kodwa wazenza ize, wathatha isimo senceku, yena enziwe ngesifanekiso somuntu. 8 Wathi ebunjwe wabonakala njengomuntu, wazithoba walalela kwaze kwaba sekufeni ukufa kwasesiphambanweni.

9 Ngakho-ke uNkulunkulu wamphakamisela endaweni ephezulu kakhulu wamnika ibizo elingaphezu kwamabizo wonke, 10 ukuba amadolo wonke aguqe ebizweni likaJesu, ezulwini lasemhlabeni kanye langaphansi komhlaba, 11 lezindimi zonke zivume ukuthi uJesu Khristu uyiNkosi, kube ludumo lukaNkulunkulu uYise.

Ukucwebezela Njengezinkanyezi

12 Ngakho-ke, bangane bami abathandekayo, njengoba lihlezi lilalela – kungayisikho nxa ngikhona kuphela, kodwa khathesi ikakhulu nxa ngingekho – qhubekani lisebenzela ukusindiswa kwenu ngokwesaba langokuthuthumela 13 ngoba nguNkulunkulu osebenzayo phakathi kwenu ukuba lifune njalo lenze okumthokozisayo.

14 Yenzani konke kungekho kusola kumbe ukuphikisana, 15 ukuze libe ngabantwana bakaNkulunkulu abangasolekiyo labahlambulukileyo, abamsulwa phakathi kwesizukulwane esonakeleyo lesixhwalileyo, lina elicwebezela phakathi kwaso njengezinkanyezi emkhathini

16 lapho liqhuba ilizwi lokuphila – ukuze ngizincome ngosuku lukaKhristu ngokuthi kangigijimelanga kumbe ngasebenzela ize.

17 Kodwa lanxa ngithululwa njengomnikelo wokunathwa phezu komhlatshelo lenkonzo evela ekukholweni kwenu, ngiyathaba ngithokoza lani lonke. 18 Ngakho lani njalo thabani lithokoze lami.

UThimothi lo-Ephafrodithu

19 Ngiyathemba eNkosini uJesu ukuba ngizathuma uThimothi kini masinyane, ukuba lami ngithokoze lapho ngisamukela izindaba ngani. 20 Kangilaye omunye onjengaye, othakazelela inhlalakuhle yenu ngobuqotho.

21 Ngoba abantu bonke bazifunela okwabo, hatshi okukaJesu Khristu. 22 Kodwa lina liyakwazi ukuthi uThimothi usezifakazele, ngoba njengendodana loyise usesebenze lami emsebenzini wevangeli. 23 Ngakho ngithemba ukumthuma masinyane lapho sengibonile ukuba izinto zingihambela njani. 24 Njalo ngiyathemba eNkosini ukuthi lami uqobo ngizakuza masinyane.

25 Kodwa ngibona kusweleka ukuba ngimbuyisele kini u-Ephafrodithu, umzalwane wami, isisebenzi kanye lami lebutho kanye lami, oyisithunywa senu futhi, elamthumayo ukuba akhangele iziswelo zami. 26 Ngoba uyalikhumbula lonke, njalo ukhathazekile njengoba lezwa ukuthi wayegula. 27 Ngempela wayegula, njalo waphosa wafa. Kodwa uNkulunkulu waba lesihawu kuye, njalo kungayisikho kuye kuphela kodwa lakimi, ukuba angiphephise osizini phezu kosizi. 28 Ngakho ngitshisekela kakhulu ukumthuma, ukuze kuthi lapho limbona futhi lithokoze lami ngibe lokunqineka okuncane.

29 Mamukeleni eNkosini ngokuthokoza okukhulu, njalo libahloniphe abantu abanjengaye,

30 ngoba waphosa wafela umsebenzi kaKhristu, wafaka impilo yakhe engozini ukuze angiphe usizo elingangiphanga lona.